Esse chelidoniae species geminae referuntur 1690
a medicis: species est major prima vocata,
altera vero minor; oculis medicatur utraque,
coecatis pullis hac lumina mater hirundo,
Plinius ut scribit, quamvis sint eruta, reddit;
hanc nasci dicit avibus venientibus illis 1695
et desiccari, solito dum more recedunt,
indeque nomen habet chelidonia, namque chelidon
dicitur haec volucris Graecorum more vocari.
Florentis succus cum melle coquatur in aere
igne levi, spumam donec projecerit omnem 1700
et quasi crassitiem mellis decoctio sumat;
utilius nullum dicunt oculis medicamen,
quos caligo nocet, si sint hoc saepe peruncti.
Conteritur juncto sibi radix ejus anetho
et sic ictericis cum vino sumitur albo;1705
dentis, ut affirmant, prohibet contrita dolorem.
De foliis ejus contusis si cataplasma
cum vino fiat, maculas abstergere dicunt.