Herbam, quam Graeci dixerunt mellisophyllon,
barrocum nostri dicunt vulgariter; illa
prae cunctis apibus gratissima dicitur herbis.
Nec gaudere magis ullius flore videntur;
contritis foliis apium si vasa perungas,1645
non fugient, meliusque facis, si lac sibi jungas,
unguine cultores retinent examina tali;
auxilium praesens apium fert ictibus illa,
ictus detrita tegitur si protinus herba,
hocque modo, quos vespa nocet vel aranea, curat. 1650
Trita solet veteres compescere cum sale strumas,
hocque modo vitiis dicunt succurrere sedis,
femina purgatur decocto cum sale succo,
tali discutitur inflatio noxia potu;
ejus si viridis decoctio saepe bibatur,1655
antiquos dysentericos juvat et ciliacos,
asthmaticis eadem prodest orthopnoicisque,
ulcera depurgat, morbos levat articulorum.
Herba canis morsus superaddita cum sale curat
ejus fomento; decoctio menstrua purgat,1660
ore retenta solet dentis sedare dolorem,
lumina purgari caligine Plinius inquit,
ejus si succo fuerint cum melle peruncta.