In primo calor esse gradu, vis sicca secundo
dicitur absinthii; stomachum corroborat herba
illius quocunque modo quis sumpserit illam,
sed melius pluviae si sit decocta liquore,65
et sic sub divo prius infrigidata bibatur.
Sic poterit variis ejus succurrere morbis,
hocque modo pellit lumbricos, mollit et alvum,
ejus et immodicum sedat sic sumpta dolorem,
urinam potu producit, menstrua solvit. 60
Illi si nardum, quam profert Gallia, jungas
et conjuncta teras et mulsa trita resolvas,
praecipue tali purgabis menstrua potu,
hoc quoque praestabunt cum lana subdita molli.
Si siler et nardus et acetum jungitur illi 65
noxia deterges potu fastidia tali.
Gramina si rutae jungas huic salque piperque
cumque mero tundens des haec decoctave potum,
noxius et crudus stomachi purgabitur humor.
Iri conjuncta pectus mire juvat hausta. 70
Acri cum vino trita se quilibet ungens
non metuat culices, ustaeque fugantur odore.
Ictericis crudam dabis hanc apio sociatam,
curat hepar, sibi si jungatur gallica nardus,
splenque sibi juncto potata juvabit aceto. 75
Sic quoque fungorum depellit sumpta venenum,
obstat letiferae cum vino sumpta cicutae,
sicque venenatis occurrit morsibus hausta,
et claros oculos reddit cum melle peruncta.
Hocque modo sugillatis superaddita prodest,80
decoctaeque vapor obstrusas liberat aures,
si manant sanie cum melle terens superadde.
Subvenit anginae melli nitroque jugata.
Vulneribus prodest contrita recentibus illa,
si superaddatur capitis sic ulcera curat,85
pruritusque juvat ejus decoctio fotu.
Nausea non poterit quemquam vexare marina,
antea commixtam vino qui sumpserit illam.
In lini panno si circumcincta geratur
Inguinis immodicum fertur cohibere tumorem. 90
Olfactu somnum capiti vel subdita praestat,
hanc sibi supponi si non praesenserit aeger.
Denigrat crines cinis ejus, si bene mixtus
ceroto fuerit et eo sint saepe peruncti.
A tineis tutam reddit qua conditur arcam. 95
Sub lingua factum curat cum melle tumorem,
livoremque nigrum, qui circa luminis orbem
apparere solet, purgabit idem medicamen.
Auris depellit sonitum cum felle bovino.
Duritiam splenis ejus cataplasma resolvit. 100
Conjuncto sibi melle sterae si subditur herba
desiccabit eam, manareque menstrua coget;
ex oleo fuerit viridis si cocta, juvabit
non modice stomachum, quot erit hoc unguine fotus.
Incaustum vino, quo sit macerata, resolve:105
si scribis chartam mus non teret amplius illam.
Plinius attollit magnis hanc laudibus herbam,
Romanosque refert sacris ex more diebus
dum quadrigarum cursu certare solerent,
absinthii succum solitos donare bibendum 110
in capitolina victori sede locato,
credentes pretium prae cunctis reddere dignum
illi, quo firmam posset servare salutem,
quae constat mundi pretio pretiosior omni.