Tertius Abrotano legitur gradus esse caloris,
et desiccandi semen ferventius herba est,
unde juvat nervos et causas pectoris omnes,
illius elixi si sit decoctio sumpta.
Sic quoque dysnoicis prodest tussimque repellit,35
et prodest lumbis, sic vulvarumque querelis.
Omnibus his crudum cum vino proderit haustum,
urinam purgat sic et praecordia mundat,
sic curat sciasim, sic sumptum menstrua purgat,
serpentes nidore fugat, bibitumque venena 40
illorum extinguit, sedat quoque frigora febris
antea quam veniant si mixto sumitur amne,
aut oleo quo decoquitur si membra perungas.
Lumbricos ventris hanc saepe bibendo necabis.
Huic panis micas et mala cidonia jungens 45
insimul amne coquas, oculorum cocta dolori
apponas vel fervori, curabit utrumque.
Stirpes infixas et spinas abstrahet ipsum
appositum per se vel adeps si jungitur illi.
Haec etiam venerem pulvino subdita tantum 50
incitat, et veneri nocuis potata resistit.