135.0689|
135.0689B| Fertur ducentos eruendis glareis
Simulque sexaginta ductos martyres.
Hic rex gravi labore tunc exercitos
Turmis petitos et sagittis saucios
Ad regna coeli a servitute terrea
Vinctos coronis extulisse tempora.
Horum tulere membra servi coelici
Marius pia jugale Martha praeditus
Junctisque votis Audifax et Abbacuc,
Quorum notantur apta coelis nomina,
Orationis gratia qui ex Persida
Apostolorum venerant ad limina
Joanne fulti nobilissimi advenae,
Honore dignus qui nitebat presbyter,
Cultuque honesto colligentes linteis
135.0689C| Emptis sacra ossa condidere Salaria.
Tunc et Quirinum amore Christi qui vigens
Proscriptionem, flagra, vincla, funera,
Spreto triumphum passus hoste sumpserat;
Quem dum tenetur foverant ergastulo
Tiberi revectum Pontiani interserunt
Bustis, decore quo decebat martyrem.
Post hunc prehensi cum Valentino in domo
Ultro manentes, qua beatus hic sacer
Confessionis clausus almae gloria
Animas sacrabat, clara dans miracula,
Queis caecitatis erutum caligine
135.0690B| Gaudere pulchra praestat Asterium face
Sudo puellae restituto lumine,
Plures tenebris luce agens hac liberos,
Ipsam patremque, conjugem ac domesticos.
Tum verberatus nec subactus fustibus
Truci capessit sectus ense coelicam
Mercede capitis quam paravit regiam.
Hinc exhibentur advenae illustrissimi
Actique flagris, terga caesi robore,
Regi superno vota reddunt gloriae.
Mox igne tosti et ungue fossi ferrea
Pensi catasta, gratias Deo litant
Christique clara in laude laeti concrepant.
Manibus recisis inclytumque in dedecus
Ad colla nexis, territis spectaculum
135.0690C| Ducti per Urbem triste dant Quiritibus.
Sic colla secti regna scandunt coelica
Caput cruore Martha gaudet tingere,
Quae mersa lympha coelum ab undis expetit;
Nec tanta adactos caede mites sufficit
Quin ne sepulcris muneraret charitas
Rogis litata conflagrarunt corpora.
Semiusta fertur ossa sed Felicitas
Rapuisse diris occulenda ab ignibus
Bustisque proprio condidisse praedio
Pure levatam conjugans viraginem.