135.0665|
135.0665B| Egregia post hos splendescens pace Philippus,
Praecelso superae decoratus nomine legis,
Participem fastus genitum facit esse Philippum;
Pontius hos martyr divina ad munia Christi
Instituens monitis, prudenti dogmate vexit,
Fulget at his mactus palma sub Valeriano;
Aeneadum primus regum, prolemque, patremque
Concordi venerans cultu cum prole Philippus,
Inclyta sceptra regit consorti fulgida cultu.
Fascibus hic altus, Christi ad mysteria curvus,
Dum Paschae excubiis ferri sibi sacra rogaret,
Luctisonos inter stare et sua crimina flentes
Praecipitur, farique et propria flere piacla.
Ille sacerdotis voto mandata capessens,
Pectore stat prono, dispellit culmina mente,
135.0665C| Maxima supremi recolit dum culmina regni.
Lugubris at tandem patrataque crimina fassus
Implorat supplex summi rex numina regis,
Divinumque manere pio sibi corde timorem
Depromens, quaesita humili sacra pectore sumit:
At Dominus pronum solito sustollere curat,
Fascibus amplificat; soli pia jura trementi
Unicus hic confertur honos supero ordine regi,
Urbis ut eductae praesignia gaudia plebis
Augusto hoc moderante micet millesimus annus,
Eximii cultus summo celebratus honore,
Quod decus hoc urbi summae inter sceptra feratur,
Urbs et apostolico jam dudum dogmate clara,
Numinis atque pii sancto insignita decore,
Principe Christicola celso hoc polleret honore.
135.0665D| Septies at postquam vestitur gramine tellus,
Septenoque replet ridentia moenia fructu,
Munere divino terris regnante Philippo
Gentibus et populisque nitentia jura dicante,
Aestuat antiquus viresque recolligit anguis,
Attritus totiens per tanta tropaea relisus;
Insidiisque parat Christi vexare phalanges,
Latronemque dolis Decium sibi praeparat aptum:
135.0666B| Instruit anguina liventis fraude veneni,
Exacuit stimulis agitatque ad furta furentem.
Ille dolos volvens inopino crimine justum
Aggreditur, furvoque necat molimine regem.
Principe subducto pervadens sceptra tyrannus,
Quae sua sunt diro curat producere nisu,
Prosternit genitum, totum movet arma per agmen;
Hinc majora petens, Domini subvertere castra
Nititur; haud mora ductorem moderaminis hujus
Impetit, atque data Fabianum lege trucidat.
Crudelis Scythae velli agmina sancta jubentis
Sumpserat hic celebri praesul moderamina nutu;
Fertur enim digressus agro, comitatus amicis,
Ecclesiae penetrasse domum, qua concio plebis
In diversa studens certabat, et optio patris;
135.0666C| Astitit ille nihil subeundae conscius arcis,
At summam tantae visurus ad extima curae.
Hic discors diversa crepat dum famina coetus.
Dissociata parans digne sociare columba,
Pacis amica, venit livorem fellis abesse
Praecipiens fibris; sentire dat omnibus unum;
Unum de multis censens praeponere cunctis,
Unius una petens caput eligit omnibus unum,
Concordesque omnes patrem connectit ad unum.
Conclamant cuncti coelesti culmine dignum,
Pontificemque legunt divino numine notum,
Atque Petri cathedrae Fabiano regmina cedunt.
Quique triumphorum servet ut gesta piorum,
Colligit hocque studere operi decernit alumnos;
Ecclesiam fulgere docet quoque legibus almis;
135.0666D| Ipse triumphali mox ut conjunctus honori est,
Disperguntur oves, lacerantur, carceribusque
Truduntur, quorum Moyses ergastula longum
Post tolerata nigris petit aetheris edita septis.
Diversis diversa gerit praedonibus hostis,
Exterius patulis, intus latitantibus armis,
Latronemque novum furtiva ad bella novatum
Deligit, impugnans bifidis pia castra catervis.