135.0683|
135.0683B| Ruffinam hoc bello capimus pariterque Secundam
Regna hominum vicisse pii fulgore triumphi,
Desponsos quarum cuneis desciscere Christi
Pessima sub dubiis monitrix formido coegit.
Hinc infensae animis pactorum foedera temnunt
Degenerum, turpesque legunt vitare sodales.
Praediolum aggressae voti solatia, magnam
Nobilius multo decernunt linquere Romam,
Sublimesque humilis sub culmo degere tecti
135.0683C| Aurato mersae quam culmine in urbe manere.
Explorant reteguntque fugam comiti Archisilao
Eversi et causam socii, qui more columbas
Accipitris sequitur, volucrumque advectus equorum
Praecipiti prendit fugientes agmine nidum;
Quas revocans Urbis praefecto ac legibus offert
Donato, clausas gemino qui separat antro,
Corde cohaerentes uno quod dissociare
Arte valet nulla. Post haec dum tertia reddit
Lux elementa operum, praesto sibi mandat haberi,
Excipiensque prius penetralibus appetit orsis
Ruffinam: « Illecebris, natu cum nobilis, inquit,
Eniteas, cur serviles sectare labores,
Nexibus ut malis gravibus captiva sedere
Libera quam grato florens gaudere marito? »
135.0683D| Reddit virgo: « Duo prorsus hortaris inepta;
Omnimodis dubium incertus promittis et unum;
Sacra litare jubes poena queis perpete plectar.
Perdere amore viri das virginitatis honorem,
Tamque adversa sequi durantia gaudia nectis,
De tete ignorans an crastina tempora cernas. »
His super hanc praeses caedi admittique Secundam
Praecipit. Illa videns flagris recubare sororem:
« Quod facis, exclamat, divini numinis osor,
Quod facis, o trucium scelerate, quid est quod honorans
Invide germanam, me indignam hoc culmine ducis? »
135.0684B| Quaesitor: « Pares insanior esse sorore. »
Illa: « Nec insana est soror, haud insanior ipsa;
Christi sed cultu Domini connectimur ambae;
Congruit et pariter caedi quas culpa ligat par
Quo simul ornemur Christi ut simul alma fatemur. »
Sicque fidem prompta superam dum laude retexunt,
Tradit eas tenebris, fumumque fimumque ministrat
Improbus exactor: sed aromata stercore surgunt
Nectareique locus flatu repletur odoris;
135.0684C| Vincitur obscurum rutilae vibramine lucis.
Tum jussae inde rapi thermisque ardentibus indi
Dum simul enectae hoc missi fervore putantur
Corpora qui tollant, sed pressa incendia cernunt
Igne Dei blandoque alacres algore sorores.
Adstupet his judex victricesque amne tegendas
Decernit Tyberi, saxo quae colla gravantur.
Fluctibus abduntur; vix transegere sub undis
Horae dimidium et referunt sua pondera laetae:
Quaeque ierant nudae tegumento vestis in undas
Vestibus ornatae emergunt immunibus amne,
Christum laudantes clarumque celeuma canentes.
Cognitor his pavidus comiti pietate fatetur
Harum se victum magica seu fraude subactum.
Reddit et addictas ipso vel judice mulctam
135.0684D| Accipiant censore suae vel vadere possint.
Archesilaus eas nil emollitus ad acta,
Abduci nemorum, mandatque in lustra perempta
Pabula silvicolis mitti alitibusque ferisque.
Gratia sed Domini caesas nec in abdita linquit
Plautillam accipimus, cujus haec rure patrata,
Matronam visae cui sunt residere parato
Gemmatae in thalamo, et sibi talia jussa ferentes:
« Desine flagitiis, cessa, Plautilla, scelestis;
Cultibus idolii jamque impia vivere linque:
Et credens Christo propriam rem visere perge,
Corporaque inveniens loculis ibi condito nostra. »
135.0685A| Exsurgens mulier monitus explere propinquat;
Et data repperiens sibi munera, credit, adorat,
Inque Dei laudes veneranda sepulcra perornat.
Hoc plures aestu passim coelestia scandunt;
135.0686A| Hoc superant Basileus pariterque Jovinus in astra
Aurea regna via caesi petiere Latina;
Lavicana parit dum quinquaginta triumphum.