Antiochiam genitus decorasti, rursus eandem
Sanguine martyrii, o Iuliane, tui.
Omni te doctum studio sapientia mundi
Reddidit insignem civibus et generi.
5Interea margaritam inventam preciosam,
Sprevisti mundum unius intuitu
Postque tibi iunctam Basilissam more iugali
Servasti intactam virgineo thalamo.
Praefuit illa choris imitanda puella sacrarum
10 Virgo puellarum iure fovenda suo;
Omnes quas primum caeli praemisit ad arcem,
Post victrix virgo mater et ipsa migrat.
Et tu, sancte puer, monachorum milia dena
Pascebas dapibus ordine continuo
15Quosque iuvante deo tanto fervore regebas,
Vt longe fama cresceret inde tua.
Martianus praeses, Christi saevissimus hostis,
Aegypti cunctas dissipat aecclesias;
Compulit hic omnes a sedibus ire fugaces:
20 Quos Iuliana choors suscipit intrepide.
Quo iubet excepto cunctos comburere preses
Huncque sibi exhibitum proterit et cruciat.
Non valet humanus tormenta exponere sermo
Cuncta ingesta viro carnificis rabie;
25Continet historiae sed multa volumen ab ipsis
Digestum sanctis, qui hunc meruere sequi.
Principio tortus divos dissolvit et aras
Quingentos, caeci restituitque oculum.
Vnica Martiani proles seu matris id ipsum
30 Perfecit corde: Celsius hunc sequitur.
Bis denus miles, germani denique septem
Haeserunt iuveni et sacer Antonius.
Hos omnes Christus Iuliano in carcere donat
Atque novam recreans consecrat ecclesiam.
35Audiit haec praeses mortemque interminat illis
Nec sibi sufficiens Caesarea arma petit.
Sint haec, ut cecini, titulorum nomine digna,
Quos sibi praecedens vindicet aecclesia.
At nova bella novam excipientia carmina poscunt
40 Vberiora, sequi historiaeque fidem.