1. Dei prudentia, quam pater genuit,
Que potest omnia, que posse voluit,
Cum in substantia cerni non potuit,
Nostre camisia se carnis induit.
2. Mirum est credere, quod fides imperat,
Quam velum littere prius velaverat:
Illum, quem capere mundus non poterat
Totum puerpere venter incarcerat.
3. Qui loci spacio non circumscribitur,
Cuius edulio mundus reficitur,
Ventre femineo totus includitur,
Lacte virgineo parvulus alitur.
4. Dei vehiculum, vas sancti spiritus
Fert vite poculum infusum celitus.
Felix cenaculum, felix discubitus,
Vbi cubiculum parat paraclytus.
5. Beata dixero Marie viscera,
Que claudit utero claudentem sydera.
† condescendat felix puerpera,
Que tali puero porrexit ubera.