1. In profundo senectutis
Naufragante seculo
Sub eodem servitutis
Teneba<n>tur vinculo.
Flebant origine
Facti transgressores,
Mortis indagine
Clausi successores.
2. A parente dirivatur
Reatus in filios,
Sed cum serpens exaltatur,
Iustus inter impios,
In illo deperit
Patriae rubigo,
In quo nil reperit
Criminis origo.
3. Ab eterno prefinita
Nostra restauratio
Venit cruce redimita
Mortis exterminio.
Naturam variat
Deus novo miro,
Vt patrem pariat
Mater sine viro.
4. Prodit mel de felle legis,
<Quod> in saltu littere
Audet contra nutum regis
Ionathas attingere.
Manna, quo pascitur
Infidelis tribus,
Hic est qui nascitur
Angelorum cibus.
5. In deserto desertari
Tribus ipsa meruit,
Que per fidem sociari
Tribus uni respuit.
Abhorret littera,
Quod non est auditum:
Virgo puerpera,
Numen inanitum.