Se halga ƿer ferde hƿilon þæt folc to lærenne 0965
geond his bisceop-rice þa abidon his geferan
for sumere neode bæftan · ⁊ he sylf rád forð ·
þa comon him to-geanes þæra cempena fær ·
on cynelicum cræte · ⁊ hi ne cuþon martinum ·
Martinus rad him ƿið unge-rydelice gescryd 0970
mid sƿeartum claþum · þa scyddon þa mulas
þe þæt cræt tugon ðurh his to-cyme afyrhte ·
⁊ to-mengdon þa ge-togu · þæt hi teon ne mihton ·
Þa ƿurdon ða cempan ƿodlice astyrode · 0974
⁊ ge-læhton martinum · ⁊ hine lange sƿungon ·
mid sƿipum · ⁊ mid stafū · ⁊ he suƿode æfre
sƿilce he ne gefredde heora sƿingla nates-hƿon ·
⁊ hi þæs þe ƿoddran ƿæron him to-geanes ·
⁊ hetelicor beoton þone halgan ƿer ·
Þa comon his geferan ⁊ fundon hine licgenne 0980
on blodigum limum · ⁊ to-beatenū lichaman ·
⁊ hofon hine up on his assan sona ·
⁊ aƿeg efston þa stoƿe on-scunigende ·
Ða cempan þa ƿoldon mid þam cræte forð · 0984
ac þa mulas ealle endemes astifodon
to þære eorþan afæstnode · sƿylce hí ærene | ƿæron ·
Hi beoton þa mid sƿipum · ⁊ mid saglum · 0987
þa mulas ealle endemes · ac hi æfre stodon
on þā ylcan stede sƿilce anlicnyssa ·
Þa cempan ða æt nextan oncneoƿan þurh ða nytena 0990
þæt hi mid god-cundre mihte gefæstnode ƿæron ·
⁊ begunnon to axienne æt oþrum ƿeg-farendum
hƿæt se man ƿære þe hi sƿa ƿælhreoƿlice beoton ·
Him ƿearð þa gesǽd þæt ƿære martin᷒ · 0994
⁊ hi sona urnon ealle him æfterƿerd ·
mid duste bestreoƿode · ⁊ dreorig-lice ƿepende
þæt hi þone halgan ƿer sƿa huxlice taƿoden ·
⁊ lagon æt his fotum mid feorhte astrehte ·
biddende his mildsunge · þæt hi moston faran ·
⁊ cƿædon þæt hi sylfe ƿæron sƿyðor þæs ƿyrþe ·
þæt hi stodon astifode on stana gelicnysse ·
oþþe þæt seo eorðe hi ealle forsƿulge ·
Martinus þa mildsode þam mannū þær-rihte · 1003
⁊ lét hi faran forð mid heora cræte ·
⁊ heora mulas þa mihton gan sona
þe ær stodon astifode on stana gelicnysse ·
Se halga ƿer sƿa-þeah ƿiste þæt hi ƿæron ge-fæstnode · 1007
ær-þan þe hí him to comon · ⁊ þæt he cydde his geferum ·
forðan-þe he fela þing feorran oft ƿiste
ærþan-þe hit geƿurde þurh ƿitigendlicne gast ·