Eft þæs on mergen þa martin᷒ fundode · 0949
þa ƿearð an cnapa of þæs þegenes hiƿrædene ·
þurh næddran geslit nealice adyd ·
sƿa þæt þæt attor smeh geond ealne þone lichaman ·
⁊ ƿæs eall | to-blaƿen · on anre bytte gelicnysse ·
Se hlaford þa euantius gelæhte þone cnapan · 0954
⁊ bær to martine micclum truƿigende
þæt him un-acumendlic nære þone cnapan to gehælenne ·
Se halga ƿer þa sona sette his hand on þone cnapan · 0957
⁊ hrepode eall his lima · ⁊ æfter þam sette
his finger on þa ƿunda · þe se ƿurm toslát ·
Hi ge-saƿon ða ealle þæt þæt attor fleoƿ ut 0960
of eallū his limum · þurh þa lytlan ƿunde ·
sƿylce of anre ædran mid his agenū blode ·
⁊ se cnapa gesund up arás ·
⁊ hi þa martinum micclum herodon ·