Anatoli᷒ hatte sum hiƿigende munuc 0792
iunglicre ylde se ƿunode sume hƿile
ƿið martines mynster mid anum mæran ealdre
clarus ge-haten · ⁊ behydde his yfelnysse ·
He æt-eoƿde þa ƿið-utan ealle eadmodnysse · 0796
⁊ unscæððig-nysse · ⁊ sæde ða æt nextan
þæt him englas ƿið spræcon · ⁊ ge-ƿunelice for-oft ·
Eft þa on fyrste þa he furðor dƿelode · 0799
he sæde þæt he dæg-hƿā-lice betƿux driht-ne · ⁊ him
ferdon heofonlice englas · ⁊ he sylf an ƿitega
unleas-lice ƿære · ac him gelyfde clarus ·
He ge-het him þa godes yrre · ⁊ yfele þreala 0803
hƿi he nolde ge-lyfan þæt he halig ƿære ·
⁊ cƿ̅ ða æt nextan · þæt hī cuman sceolde
on þære ylcan nihte frā þā ælmihtigan gode
heofonlic reaf · ⁊ he mid þā gescryd
be-tƿux him ƿunigende godes mihte æteoƿde ·
Hƿæt þa on middre nihte ƿearð þæt mynster astyrod · 0809
⁊ ƿearð micel gehlyd · hlihhendra deofla ·
⁊ þæs muneces cyte mid leohte ƿearþ afylled ·
⁊ he eode sylf ut mid þam scinendan reafe ·
⁊ anū oþrū munece þa mærþa æteoƿde ·
Þær comon þa má · ⁊ clarus æt nextan · 0814
⁊ sceaƿodon mid leohte þone scinendan gyrlan ·
hit ƿæs sƿiðe hnesce · scinende sƿa sƿa purpura ·
ac hi ne mihton to-cnaƿan hƿilces cynnes hit ƿære ·
ne hí ne mihton undergitan buton hit | ƿære reaf ·
ne mid heora grapunge · ne mid heora sceaƿunge ·
Þa ge-ƿearð him on mergen þæt [sic @ Skeat] hí þone munuc læddon 0820
to þam halgan martine · ac se munuc nolde ·
cƿ̅ þæt he ne moste to martine cuman ·
forþan-ðe he ƿiste þæt he mid feond-licū cræfte
ne mihte bedydrian martines gesihðe ·
Hi þa hine tugon unþances þider-ƿeard · 0825
⁊ þæt reaf sona of heora gesihþe fordƿán ·
⁊ ƿæs ða gesƿutelod his scin-cræft · ⁊ hiƿung ·
Þas mihta ƿe tellað to martines geearnungū · 0828
þæt se deofol ne mihte his gedƿimor bediglian
gif he become ætforan his gesihþe ·
On þam ylcan timan ƿæron oþre gedƿolan 0831
antecristes lima mid arleasra hiƿunge ·
sum ƿæs on hispania þe for-speon þæt land-folc ·
⁊ mid manegū gedƿimorū hi bedydrode lange ·
⁊ cƿ̅ þæt he ƿære helías se ƿitega ·
He cƿ̅ eft syþþan þæt he crist sylf ƿære · 0836
⁊ þa sum bisceop for his bileƿit-nysse ·
gelyfde þam hiƿere · ⁊ hine to him gebæd ·
⁊ he ƿearð for þam gedƿylde adræfed of his an-ƿealde ·
Sum oþer gedƿola ƿæs eac on east-dæle · 0840
se cƿ̅ þæt he ƿære iohannes se fulluhtere ·
eac sƿilce lease ƿitegan ær þisre ƿorulde ge-endunge
on gehƿilce land cumað · ⁊ þone ge-leafan amyrrað ·
oþ-þæt antecrist sylf ende-next becymð ·