Martinus com hƿilon to middes ƿintres timan 0845
to anū preost-life · ⁊ hi ge-logodon þa his bæd
on þæs mynstres spræc-huse · ⁊ þær micel fyr ƿæs gebet ·
Þa ƿoldon ða preostas hī ƿurðlice beddian · 0848
⁊ bæron micel streaƿ to his beddinga ·
⁊ þæs fyres ne gymdon þe on þære flora ƿæs ·
Eft þa þa se halga ƿer cō | þa toƿearp he þæt streaƿ 0851
eall of þære beddincge · for-þan-þe he oftost læg
uppon anre hæran on þære baran flora ·
Ða on-scunede he þa softnysse · þære seltcuðan beddinge · 0854
⁊ læg on þære flora · sƿa sƿa ƿe her beforan sædon ·
inn ƿæs sƿyþe nearo · ⁊ þær lagon stoccas · 0856
⁊ þa on middre nihte þa men fæstost slepon ·
þa ƿearð þæt fyr ontend sƿyðe færlicū bryne ·
⁊ þæt litle hus mid þam lige afylde ·
Martinus þa ƿearð a-ƿreht mid þam lige · 0860
⁊ þær næs nan man mid hī on þā huse ·
⁊ he on þam færlican gelimpe gelæhte þa dura ·
⁊ ne mihte þa scyttelsas unscyttan sƿa hraðe ·
⁊ se lig him ƿand ƿælhreoƿlice on-butan
sƿa þæt him for-burnon on þam bæce his reaf ·
⁊ he for ðam bryne ut-bræcan ne mihte ·
He beþohte þa hine sylfne · ⁊ geseah þæt [þæt @ Skeat] he ne mihte 0867
þurh nænne fleam · þam fyre ætƿindan ·
ac þurh godes mihte he hit moste ofer-sƿyðan ·
For-lét þa dura ða · ⁊ to-midden þam lige 0870
to þam ælmihtigan gode anmodlice clypode ·
⁊ on þære frecednysse fæst-mod þurh-ƿunode ·
⁊ þær ƿearð þa geƿorden micel ƿundor þurh god ·
sƿa þæt hine for-beah on ælce healfe þæt fyr ·
⁊ he orsorh abád · on þam bryne middan ·
þurh drihtnes mihte sƿilce he on deaƿe ƿære ·
Þa ƿurdon his munecas aƿrehte mid þam fyre · 0877
þær ðær hi lagon · þa þa hi þone lig gesaƿon
⁊ to-bræcon þa dura · ⁊ to-brudon þæt fyr ·
⁊ martinū gelæhton of þā lige middan ·
Hi ƿendon þæt he ƿære ƿitodlice for-bærnd · 0881
on sƿa lang-sumum bryne þonne þæt brast-ligende fyr
on slæpe hi aƿrehte · ⁊ he sæde syððan
þæt he þæs | fyres bryne gefredde him onbutan
sƿa lange sƿa he ƿan ƿið þære dura scyttelsas ·
Sona sƿa he hine bletsode · ⁊ gebæd hine to gode · 0886
þa beah eall se líg abutan him aƿeg
⁊ him þuhte sƿilce he ƿære on ƿynsumū deaƿe ·
He sæde eac for-oft mid incundre geomerunge · 0889
þæt se sƿicola deofol hine besƿ́ac [sic @ Skeat] for-nean ·
þa þa he of þā slæpe asceacen ƿearð sƿa færlice ·
þæt he þone rǽd ne cuþe þæt he hine sƿa hraþe gebæde ·
ac to late began hine gebiddan · to gode
þæt he hine alysde · of þæs liges frecednysse ·
Be þam mæg under-gitan se þe þas bóc ræt · 0895
þæt martinus næs þurh þa micelan frecednysse
to forƿyrde gecostnod · ac ƿæs afandod
sƿa sƿa se apostol paulus on his pistole sæde ·
þæt he sylf ƿunode on sǽ-grunde middan
ofer dæg ⁊ ofer niht · ungederod þurh god ·