On sumne sæl eft siþþan cō se sƿicola deofol 0749
into þā halgan ƿere · þær he on his gebedū ƿæs ·
mid purpuran ge-scryd · ⁊ mid kynelicū gyrlum ·
mid gyldenū cyne-helme · ⁊ mid goldfellenū sceon ·
⁊ mid blyþre ansyne · on micelre beorhtnysse ·
Þa ne cƿ̅ · | heora naðor nan ƿord to oþrū 0754
to langere hƿile · ⁊ þa embe lang cƿ̅
se deofol ærest to þam drihtnes men ·
Oncnaƿ nu martine þone ðe þu gesihst · 0757
ic eom crist · þe astah to þisre ƿorulde
⁊ ic ƿolde gesƿutelian me sylfne ærest þe ·
Martin᷒ þa suƿode · ⁊ se sƿicola eft cƿ̅ · 0760
Hƿæt tƿynað þe martine · gelyf · ic eom crist · 0761
Þa underget se halga ƿer þurh haligne gast · 0762
þæt hit se sylfa deofol ƿæs · na his drihten · ⁊ cƿæð ·
Ne sæde na ure drihten þæt he mid cyne-helme · 0764
oððe mid purpuran gescryd · cuman ƿolde to us ·
⁊ ic ne gelyfe þæt [þæt @ Skeat] he to us cume
buton on þam ylcan hiƿe þe he on þroƿode ·
⁊ butan he æteoƿige þa ylcan dolhsƿaðe
þære halgan rode þe he on ahangen ƿæs ·
Se deofol þær-rihte for-dƿán sƿa sƿa smic · 0770
of þæs halgan gesihðe · ⁊ þæt hus afylde
mid ormætum stence · þæt man eaðe mihte ƿitan
þæt hit se deofol ƿæs · þe hine dƿelian ƿolde ·
⁊ þis sæde martinus Sulpicio þam ƿritere ·