Martinus eode mid his munecum sume dæg 0901
to-cyrcan-ƿerd on ƿintres timan ·
þa cō þær sum þearfa healf nacod him togeanes
biddende georne þæt he him sumne clað sealde ·
Þa het martinus his erce-diacon sona 0905
þæt he butan yldinge þone þearfan scrydde ·
⁊ eode æfter his ƿunon into þam spræc-huse ·
⁊ þær ƿunode ana oþ þæt he ƿolde mæssian ·
Þa nolde se erce-diacon þone þearfan scrydan · 0909
⁊ se þearfa bestæl into martine ·
⁊ to him be-mænde þæt him [ƿære] þearle cól ·
Martinus þa sona hine sylfne unscrydde 0912
under his ceppan digellice · ⁊ dyde on þone þearfan
his agen reaf · ⁊ het hine út-gán ·
Þa æfter lytlum fyrste com se erce-diacon · 0915
⁊ cƿ̅ þæt hit tima ƿære þæt he into cyrcan eode ·
þam folce to mæssigenne · ⁊ godes mærsunge dón ·
Martinus him cƿ̅ to þæt he | ne mihte na gán 0918
æror to cyrcan · ær se þearfa ƿære gescryd ·
⁊ se erce-diacon ne under-get · þæt he ƿið-innan his cæppan
nacod þær sæt · ⁊ sæde þæt he nyste
hƿær se þearfa ƿære · ⁊ þa cƿ̅ martin᷒ ·
sy þæt reaf ge-broht hraðe hider to me ·
ne ateorað us na þearfa to scrydenne ·
Se erce-diacon þa yrsigende eode · 0925
⁊ brohte an reaf unge-rydelic him to
ƿáclic ⁊ lytel · mid lytlan ƿurðe geboht ·
⁊ mid fullū yrre æt his fotum lede ⁊ cƿ̅ ·
Hér ís reaf · ⁊ her nis nan þearfa · 0929
Þa næs se halga ƿer for his ƿordum astyrod · 0930
ac het hine an-bidian þær-ute sume hƿile ·
ƿolde þæt he nyste þæt he nacod ƿære ·
He scrydde hine ða mid þā ylcan reafe · 0933
⁊ eode to cyrcan · ⁊ sona mæssode ·
Æt þære ylcan mæssan þry munecas gesaƿon · 0935
⁊ an þære preosta · ⁊ án of þam nunnum ·
bufan martinus heafde sƿilce an byrnende cliƿen ·
sƿa þæt se líg abrǽd þone loc up feor ·
⁊ ne moste na má manna þas mihte geseon ·