Eac sƿilce þa deofla mid heora searo-cræftū 0706
hī comon gelome to · ⁊ he on-cneoƿ hi æfre ·
for-þan-þe hī nan deofol ne mihte bediglian hine sylfne ·
ne on agenre edƿiste ne on oþrū hiƿe ·
Mid þusend searo-cræftum ƿolde se sƿicola deofol 0710
þone halgan ƿer on sume ƿisan besƿican ·
⁊ hine ge-seƿen-licne on manegum scin-hiƿū
þā halgan æteoƿde · on þæra hæþenra goda hiƿe ·
hƿilon on ioues hiƿe · þe is ge-haten þór ·
hƿilon on mercuries · þe men hatað oþon ·
hƿilon on ueneris þære fulan gyden ·
þe men hatað fricg · ⁊ on manegū oþrum hiƿum
hine bræd se deofol on þæs bisceopes gesihþe ·
Martinus þær togeanes mearcode hine sylfne 0719
symle mid rode-tacn · ⁊ sang his ge-bedu
unforht þurh-ƿunigende · ⁊ æfre on god truƿigende ·
Þa þa se deofol | ge-seah þæt [þæt @ Skeat] he hine bedydrian ne mihte 0722
mid his searo-cræftum · þa sæde he hī hosp-ƿord ·
⁊ mid manegū talum hine tynde for-oft ·
ac he næs gestirod for his leasū talum ·
Sume munecas eac þe on þā mynstre ƿunodon 0726
sædan to soðan þæt hi sƿutollice ge-hyrdon ·
hu se deofol þreade mid dyrstigū stemnū
ðone halgū martinū · for-þā-þe he hæfde mid him
sume under-fangene · þe synfulle ƿæron ·
⁊ æft̅ heora fulluhte fela to yfele dydon ·
⁊ sæde open-lice hƿæt heora ælces syn ƿære ·
Martin᷒ þa ⁊ƿyrde þā manfullū deofle · 0733
⁊ cƿ̅ þæt þa ealdan synna mid heora ge-cyrrednysse ·
⁊ beteran drohtnunge · mihton beon adylgode ·
⁊ þurh godes mildheortnysse hi mihton beon alysde ·
frā heora synnum · þa ða hi ge-sƿicon yfeles ·
Se deofol þa clypode ⁊ cƿ̅ hī to-geanes · 0738
þæt þa leahter-fullan næron nanre miltsunge ƿurðe ·
⁊ þa þe æne aslidan · þæt hi eft ne sceoldon
æt drihtne habban ænigne miltsunge ·
Þa cƿ̅ martinus to þam manfullan eft ðus · 0742
þeah ðu earming ƿoldest on þisū end-nextan timan
manna ehtnysse gesƿican · ⁊ þine dæda behreoƿsian ·
ic on god truƿode · þæt ic þe mildsunge behete ·
Eala hu halig dyrstig-nyss be drihtnes arfest-nysse 0746
hé ge-sƿutelode his sƿiðlican lufe
þeah þe he þa fremminge forð-bringan ne mihte ·