Oft martin᷒ geseah englas hī to cuman 0682
sƿa þæt hi hiƿ-cuð-lice to þā halgan spræcon ·
⁊ on sumne sǽl sū engel hī sæde
hƿæt þa oþre bisceopas on heora sinoþe spræcon
⁊ se halga ða ƿiste hƿæt hi þær ræddon
þurh þæs engles segene · þeah ðe he sylf þær ne cóme ·
Þa halgan apostolas petrū ⁊ paulum he ge-seah ge-lome · 0688
sƿa sƿa he sæde hī-sylf sulpicio | þā ƿritere
þe hine axian dorste ælces þinges þe he ƿolde ·
Se ylca sulpicius ⁊ sū oðer broðor 0691
sæton sume dæg sƿiðe afyrhte
ætforan martines Inne · ⁊ he hi þær-ute nyste ·
þa gehyrdon hí motian ƿið martine lange ·
⁊ he ƿæs ana ǽr innan þā huse belocen ·
Eft þa ða he ut-eode þa axode sulpicius · 0696
⁊ hine eadmodlice bæd þæt he hī ge-openian sceolde
hƿa hī ƿið-spræce · þa ƿandode he lange
hī þæt to secgenne · ac he sæde sƿa-þeah ·
ic halsige eoƿ nu · þæt ge hit nanū ne secgan ·
Maria cristes modor cō to me hider · 0701
mid tƿā oþrū mædenū tecla ⁊ agne ·
⁊ na on þisū anū dæge ac oft rædlice ær
hi comon to me · ⁊ he sæde him eac
hƿilc heora ƿlitu ƿæs · ⁊ hu hi ƿæron ge-scrydde ·