Martin᷒ ferde hƿilon to ualentiniane þā casere 0650
ƿolde for sumere neode ƿið hine spræcan ·
ac his micele mod · ⁊ his manfulla ge-bedda
þe mid arrianiscum gedƿylde dƿeligende lyfode ·
noldon geðafian þā halgan bisceope ·
þæt he infær hæfde his ærende to abeodenne ·
ac het se arleasa hine utan belucan ·
forþā-ðe he ƿiste þæt he ƿolde þæs biddan
| þe he tiðian nolde · ⁊ tynde þone halgan ·
Þa cō martin᷒ eft embe ða ylcan spræce · 0659
to þā modigan casere · ac man hine beclysde ƿiðutan ·
⁊ he þa geƿende to his ge-ƿunelican helpe ·
scrydde hine mid hæran · ⁊ mid axū be-streoƿode ·
⁊ fæstende þurh-ƿunode on singallum gebedū
oð-þæt an scinende engel on þā seofoþan dæge
hī cō to · ⁊ cƿ̅ þæt he to þam casere ferde ·
⁊ hī ælc get sceolde beon open to-geanes ·
⁊ þæs modigan caseres mod beon geliðegod ·
Se bisceop þa ferde sƿa sƿa hī be-bead se engel · 0668
⁊ hī ƿearð ge-openod ælc gæt togeanes ·
oð-þæt he færlice stod æt-foran þā casere ·
Þa yrsode se casere for his ingange · 0671
⁊ nolde hine ƿylcumian · ac þær ƿearþ godes miht
sƿ́a [sic @ Skeat] þæt heofonlic fyr hangode ofer his setl ·
⁊ þæt [sic @ Skeat] setl ontende · ⁊ hine sylfne ƿolde
gif he þe hraðor ne arise · aƿorpenre reðnysse ·
⁊ þone bisceop cyste · ablicged þurh god ·
þone þe he ær geteohhode mid teonan to for-seonne ·
He behet þa ge-sƿicennysse sona þā bisceope · 0678
⁊ he hī ælces þinges tiþode · ærþan-þe he hine bæde
þæs þe he frymdig ƿæs · ⁊ him freondlice to-spræc ·
⁊ hī fela gifa bead · ac he heora onfon nolde ·