Maximus se casere þe ƿæs on martinus dæge · 0610
gelaðede for-oft þone arƿurðan ƿer
þa ða he him ƿið spræc þæt he ƿære his ge-metta ·
þa for-hæfde he hine æfre frā his ge-beorscipe ·
cƿ̅ þæt he ne mihte his gemetta beon
þe anne casere ofsloh · ⁊ oþerne aflymde ·
Þa ⁊ƿyrde maximus martine ⁊ cƿ̅ · 0616
þæt he næfre sylf-ƿilles þone anƿeald ne under-fenge ·
ac ƿære frā his cēpum gecoren unþances
to ðā cyne-dome · ⁊ ƿið-cƿeðan ne mihte ·
⁊ þæt he on-gean godes ƿillan ƿinnan ne mihte ·
⁊ forþy mid ƿæpnum hine ƿerian sceolde ·
cƿ̅ eac cƿ̅ nan man nære frā him ofslagen
buton þā anum þe him onfeohtende ƿæron ·
Þa ƿearð martin᷒ mid þæs caseres beladunge · 0624
⁊ eac þurh his bene · gebiged to his ge-reordunge ·
He nolde næfre lyffettan ne mid olecunge spræcan 0626
| ne furðon to þam casere sƿa sƿa his geferan dydon ·
sƿa sƿa he on þam ylcan gereorde gesƿutelode mid dæde ·
He sæt to þam casere · ⁊ hi sƿyðe blyðe ƿæron 0629
for martines gereordunge · ⁊ man bær þam casere
sƿa sƿa hit geƿunelic ƿæs ƿín on anre blede ·
Þa het he þone byrle beodon martine ærest · 0632
ƿolde æfter ðā bisceope his bletsunge drincan ·
Martin᷒ þa dranc · ⁊ his mæsse-preoste sealde 0634
healfne dæl þæs ƿætan þe ƿæs on þære blede ·
for-þan-þe he ƿiste þæt he ƿurþost ƿæs ·
æft̅ him to drincenne · ⁊ hí ealle þæs ƿundrodon ·
⁊ mærsodon his anræd-nysse geond ealne þone hired ·
He sæde þa þam casere sƿa sƿa hī becō siððan · 0639
þæt gif he ferde to ge-feohte sƿa he gemynte
ongean ualentinianū þe he aflymde ær
of his cyne-dome · þæt [sic @ Skeat] hī come sige ·
ac æfter lytlū fyrste he sceolde feallan ofslagan ·
⁊ hit geƿearð sƿa sƿa him geƿitegode martinus ·
He ferde þa siþþan to feohtenne ƿið þone casere · 0645
⁊ on þā forman onræse he afligde ualentinianū ·
ac eft embe geares fyrst he beferde maximū
binnan anre byrig aquileiam ge-haten ·
⁊ hine þær ofsloh · ⁊ siððan to his rice feng ·