On ðære ylcan tide on þam ylcan fæstene 0527
eode martin᷒ to anes mannes huse ·
þa æt-stod he færlice æt-foran þā þrex-ƿolde ·
cƿ̅ þæt he egeslicne feond on þam incofan gesaƿe ·
Martinus þa het þone hetolan deofol · 0531
þæt he | þanon ge-ƿite · ⁊ he ƿearð þa yrre
gelæhte ænne mannan ⁊ ƿearð him on-innan ·
of þæs þegenes hiƿrædene · ⁊ he þearle þa ƿedde ·
⁊ began to toterenne þa þe he to mihte ·
Þa fleah seo hiƿ-ræden · ⁊ þæt folc eac sƿá · 0536
ac martin᷒ eode ðam ƿodan men togeanes
het hine sona standan · ⁊ he stod þa gynigende ·
⁊ þyƿde mid muþe þæt he martinum abite ·
Þa dyde martin᷒ on muð þam ƿodan 0540
his agenne fingras · ⁊ het hine fretan
gif he ænige mihte hæfde · ac he ƿið-bræd þa ceaflas
frā þære halgan handa · sƿilce frā hatan isene ·
Ða adræfde se halga ƿer þone hetolan deofol 0544
of þam ge-drehton menn · ac he ne moste faran
þurh þone muð ut þe martin᷒ hrepode ·
ac fúllice ferde þurh his forð-gang ut ·