Se halga martinus to-ƿearp sum hæðen-gild
on sumere tíde · on sumere stoƿe ·
þa ƿæs an pin-treoƿ ƿið þæt templ ge-friðed
sƿiðe halig ge-teald on þa hæþenan ƿisan ·
þa ƿolde he for-ceorfan eac sƿilce þæt treoƿ ·
ac ða hæðen-gildan þā halgan ƿið-cƿædon ·
sædon þæt hi ne mihton on heora mode findan ·
þæt he þæt treoƿ for-curfe · þeah ðe he heora templ toƿurpe ·
Ða cƿ̅ se halga bisceop þæt on þā beame 0396
nære nan synderlic halignyss · ⁊ sæde þā hæþenū
þæt hi sƿiðor sceoldon þone soðan god ƿurðian ·
⁊ aheaƿen þæt treoƿ þe ƿæs ge-halgod deofle ·
Þa cƿ̅ an ðæra hæþenra to þam halgan bisceope · 0400
Gif þu ænigne truƿan hæbbe on þinū gode · 0401
ƿe for-ceorfað þæt treoƿ · ⁊ þu hit feallende under-foh ·
⁊ gif þin god is mid ðe · þu gæst aƿeg gesund ·
| Martin᷒ ða unforht fæste on god gebyld 0404
be-het þæt he ƿolde mid ƿeorcum þæt ge-fyllan ·
Hi þa ealle glæd-mode begunnon to ceorfenne 0406
þone heagan pin-beam · ⁊ he ƿæs a-hyld
on ane healfe þæt man eaðe mihte ƿitan
hƿider he sigan ƿolde · ⁊ hi setton martinū
þær-foran ongean · þæt he hine offeallan sceolde ·
Þa ƿæron his munecas ƿundorlice afyrhte · 0411
⁊ nan oðer ne ƿendon buton he ƿurde ðær of-hroren ·
⁊ se beam þa feallende beah to martine ·
Martinus þa unforht ongean þæt feallende treoƿ 0414
ƿorhte rode-tacn · ⁊ hit ƿende þa ongean ·
sƿilce hit sum færlic þoden þydde under-bæc ·
sƿa þæt [þæt @ Skeat] hit of-feol for-nean þæs folces
micelne dæl · þe þær orsorge stodon ·
Þa hrymdon þa hæþenan mid healicre ƿunðrunge · 0419
⁊ þa munecas ƿeopan for þære ƿundorlican blysse ·
⁊ hi ealle cristes naman clypodon mid herunge ·
⁊ eall se leod-scipe to geleafan þa beah ·
To þā sƿiðe hi ƿurdon þurh þæt ƿundor gecyrrede · 0423
þæt hi geond eall þæt land mid ge-leafan a-rærdon
cyrcan · ⁊ mynstra · ⁊ martin᷒ æfre
sƿa hƿær sƿa he þa deofol-gild to-ƿearp · sƿa ƿorhte he cyrcan ·