Æft on sumne sæl siðode martin᷒ 0366
on his bisceop-rice · þa bær man þær an líc
anes hæðenes mannes þæt hi hine be-byrigdon ·
Ða be-heold martinus þa hæðenan feorran · 0369
⁊ ƿende þæt hi bæron sƿa sƿa heora geƿune ƿæs
heora deofol-gild dƿollice ofer heora land ·
⁊ ƿorhte þa rode-tacn ƿiþ þæs folces ƿerd ·
⁊ bead him | on godes naman þæt hi hit ne bæron na furðor ·
ac aledon þa byrðene · ⁊ þa bær-men sona
stede-fæste stodon · sƿilce hi astifode ƿæron ·
Þær mihte ƿundrian se ðe ƿære gehende 0376
hu þa earman bær-menn gebundene to earðan
ƿendon hi abutan · ƿoldon forð gán ·
ac ða þa hi ne mihton of þære moldan astyrian ·
þa asetton hí þæt lic · ⁊ beseah ælc to oþrū
sƿiðe ƿundrigende · hƿi him sƿa ge-lumpe ·
Ac þa þa martin᷒ oncneoƿ þæt hí mid lice ferdon 0382
na mid deofol-gilde · þa dyde he up his hand ·
⁊ sealde hī leafe to siþigenne forð ·
⁊ þæt líc to berenne to byrgene · sƿa sƿa hí ge-mynton ·
Ðus se halga bisceop geband hí mid ƿorde · 0386
⁊ eft þa ða he ƿolde let hí aƿæg gán ·