Ðær ƿæs þa ge-hende þam halgan mynstre 0341
| sƿilce an halig stoƿ sƿyðe geƿurðod
frā folces mannum · sƿilce ðær martyres lagon ·
⁊ þa ærran bisceopas arƿurðoden þa stoƿe ·
⁊ þær ƿeofod ge-halgodon ƿolice sƿa-ðeah ·
Martinus ða ne ge-lyfde þam leasū ge-dƿimore · 0346
ac axode smealice þa yldostan preostas
þæs martyres naman · oþþe hƿænne he ge-martyrod ƿære ·
ac heora nan nyste nan geƿis be þam ·
Þa nolde martin᷒ ge-neosian þa stoƿe · 0350
ne þā folce ne lyfde · ac fór sume dæg tó
mid feaƿū ge-broþrum · ⁊ stód æt þære byrgene ·
biddende þone ælmihtigan god · þæt he be þam gesƿutelode
hƿæt he soþlice ƿære · oððe hƿilcere geearnunge
þe þær bebyrged ƿæs · ⁊ ge-ƿurðod oþ þæt ·
Þa be-seah se halga ƿer to his ƿynstran healfe · 0356
⁊ geseah þær standan ane atelice sceade ·
⁊ sæde þæt he ƿære ofslagen for ðyfþe ·
⁊ on ƿite ƿunode · na on ƿuldre mid martyrū ·
⁊ ƿære geƿurðod ƿolice frā þā folce ·
Hit ƿæs ƿundorlic sƿa-þeah þæt hine sƿutollice ge-hyrdon 0361
ealle þe ðær ƿæron · ac hi ne ge-saƿon hine
butan martin᷒ ana þe hit him eallū sæde ·
He het sona þa aƿæg dón þæt ƿeofod of þære stoƿe · 0364
⁊ þæt folc alysde frā þā leasum ge-dƿylde ·