On þære ylcan tide þæt turonisce folc 0254
ƿilnigende ƿæs þæt martinus ƿære
to bisceope ge-halgod to heora burh-scire ·
ac martin᷒ nolde ut of þam mynstre na hƿider ·
oþ þæt sum his neh-gebura gesohte his fet
sæde þæt his ƿif lage sƿiðe ge-brocod ·
⁊ begeat þa un-eaþe þæt he ut ferde ·
⁊ seo burh-ƿaru cepte hƿænne he ut come ·
⁊ gelæhton hine sona · ⁊ gelæddon to þære byrig
turonia gehaten þæt he ƿurde gehadod ·
Þa clypode eall seo meniu ⁊ cƿædon an-modlice 0264
þæt martinus ƿære ƿyrðe þæs hades ·
⁊ ge-sælig sacerd to sƿilcum bisceop-dome ·
Þær ƿæron bisceopas of gehƿilcum burgum 0267
to þære ge-corennysse · þa ƿið-cƿædon hí sume
þæt martinus nære ƿyrðe sƿa miceles hades ·
for his ƿacum gyrlum · ⁊ þær ƿið-cƿæð sƿiþost
an þæra bisceopa defensor gehaten ·
ac he ƿearð gescynd þurh godes seþunge ·
Þa sceolde man rædan sume rædinge him æt-foran · 0273
ac se rædere ƿæs utan belocen · þa ge-læhte sum preost
ænne sealtere sona · ⁊ þæt ærest gemette
rædde him æt-foran þæt ƿæs þis fers ·
Of unsprecendra muþe · ⁊ sucendra þu ful-fremedest þin 0277
lof drihten for þinū feondum · þæt þu toƿurpe feond
⁊ defensor ·
Sona sƿa his fers ƿæs æt-foran him geræd · 0280
þa ƿearð þæt folc astyrod | onsƿiðlicum hreame ·
þæt godes sylfes seðung þær gesƿutelod ƿære ·
⁊ defensor mihte his mán þær to-cnaƿan ·
⁊ þæt god ƿolde ƿyrcan his lof
on þam un-scæððigan martine · ⁊ gescyndan defensor ·
Þa under-feng se halga ƿer bisceop-hadunge þær · 0286
⁊ þone hád sƿa ge-heold · sƿa hit is unsecgendlic ·
mid þære ylcan an-rednysse · þe he ær onƿunode ·
mid þær ylcan eadmodnysse · ⁊ mid þam ærran reafe ·
⁊ sƿa he ƿæs ge-fylled mid ge-þungen-nysse ·
⁊ mid þæs hades · ƿurð-scype · þæt he mid ƿeorcū gefylde
ge þone bisceop-dóm · mid eallū ƿurð-scipe ·
ge þone munuc-hád betƿux mannū ge-heold ·
He ƿæs soðfæst on dome · ⁊ est-ful on bodunge · 0294
arƿurð-ful on þeaƿum · ⁊ þurh-ƿacol on ge-bedum ·
singal on rædinge · ge-stæððig on his lece ·
arfæst on ge-ƿilnunge · ⁊ arƿurðful on his þenungum ·
Eala hƿilc ƿel-ƿillend-nys ƿæs on his spræcum · 0298
⁊ hƿilc ge-þungennys ƿæs on his þeaƿum ·
⁊ hu micel glædnys on gastlicum dædum
ƿunode on þam halgan mid healicre frēminge ·
Eadig ƿæs se ƿer · on þam ne ƿunode nan facn · 0302
nænne hé ne for-demde · ne nanū hé ne for-geald
yfel mid yfele · ac he eaðelice for-bær
manna teonrædene mid micclū ge-þylde ·
Ne geseah hine nan man nates-hƿon yrre · 0306
ne on mode murcnigende · ne mislice ge-ƿorhtne ·
ac on anre anrædnysse æfre ƿunigende
ofer mannes gemet · mid mycelre glædnysse ·
Sume hƿile he hæfde hus ƿiþ þa cyrcan · 0310
þa æfter sumū fyrste | for þæs folces bysnunge ·
⁊ for þære unstil-nysse · he ge-staðelode him mynster
tƿa mila of þære byrig · ⁊ seo stoƿ ƿæs sƿa digle
þæt he ne ge-ƿilnode nanes oþres ƿæstenes ·
On ane healfe þæs mynstres ƿæs an ormæte clif 0315
ascoren rihte adune · ⁊ seo deopa ea
liger gehaten · læg on oðre sidan ·
sƿa þæt man ne mihte to þā mynst[r]e cuman
butan þurh ænne pæð þæt he in-ganges bæde ·
Hund-eahtatig muneca on þam mynstre ƿunodon 0320
under martines lareoƿ-dome mærlice drohtnigende ·
⁊ ealle heora þincg him ƿæron gemæne ·
⁊ þær nan man næfde nan þing synderlices ·
ne hi cepes ne gymdon · ne naht syllan ne moston ·
buta þam anū þe heora big-leofan forð dydon ·
ne moste þær nan broðor begán nænne cræft ·
buton he hine ge-bæde · oððe béc ƿrite ·
Þa ƿæron gebysgode þa yldran ge-broðra 0328
on singalum gebedum · ⁊ seo iuguð ƿrat ·
⁊ ƿunodon on stilnysse · sƿa sƿa him geƿissode martin᷒ ·
At-somne hi æton on ge-settum timan · 0331
⁊ hi ƿines ne gymdon buton ƿan-halū mannū ·
⁊ manega þær hæfdon hæran to lice ·
⁊ þær hnesce geƿæda · ƿæron to læhtre getealde ·
Æþel-borene ƿeras þær ƿunodon on þā mynstre · 0335
þe ƿæron estlice afedde · ac hi geƿyldon hi sƿa-þeah
to þære ylcan stiðnysse þe þær stod on þā mynstre ·
⁊ manega ƿe ge-saƿon siððan of þā bisceopas ·
Lá hƿilc burhscír ƿæs þe nolde bisceop geceosan 0339
of martines mynstre · for his mærū gebysnungū ·