Ða þa þæs halgan ƿeres lic læg inne þa git · 1441
þa com þær micel meniu of manegū burgū ·
⁊ þæt pictauisce folc sƿa sƿa þæt turonisce ·
⁊ þær ƿearð ge-flit be-tƿux þam tƿam folcū ·
Þa pictauiscan cƿædon þe ðyder gecumene ƿæron · 1445
He ƿæs ure munuc · ⁊ eac ure abbod · 1446
ƿe ƿillað hine habban for-þan-þe ƿe hine alændon ær ·
gé brucon his spræce · ⁊ his lare notedon ·
ge ƿæron on his ge-reordū · ⁊ mid his gebletsungū ge-strangode ·
⁊ mid mænig-fealdum ƿundrū ƿæron gegladode ·
sy eoƿ eall þis ge-noh · lætað nu huru us
his saƿl-leasan lichaman ferian mid us ·
Þa andsƿaredon þa · þa turoniscan þus · 1453
Gif ge secgað þæt us synd genoh his ƿundra · 1454
þonne ƿite gé þæt he ƿorhte ma ƿundra mid eoƿ
þonne he mid us dyde · ⁊ þeah ƿe fela for-hebbon ·
eoƿ he arærde ƿitodlice tƿegen deade men ·
⁊ us buton ænne · ⁊ sƿa sƿa he oft sæde ·
þæt he maran mihte on munuc-hade hæfde ·
þonne on bisceop-hade · ⁊ ƿe habbað nu neode
þæt he dead gefylle þæt he ne dyde on life ·
Eoƿ he ƿæs æt-broden · ⁊ us frā gode forgifan (sic) · 1462
⁊ æft̅ þa ealdan gesetnysse he sceal habban | byrgene
on þære ylcan byrig þær he bisceop ƿæs ·
Gif ge for minstres þingon · ⁊ þæt he mid eoƿ ƿæs 1465
hine habban ƿillað · þonne ƿite ge þis
þæt he on mediolana ærest mynster hæfde ·
Betƿux þisū geƿinne ƿearð se dæg ge-endod · 1468
⁊ butu ða burh-ƿaru besæton þone halgan ·
⁊ ƿoldon ða pictauiscan mid geƿinne on mergen
niman þone halgan neadunga æt þā oþrū ·
Þa on middre nihte sƿa sƿa martinus ƿolde · 1472
ƿurdon þa pictauiscan sƿa ƿundorlice on slæpe
þæt of ealre þære meniu an man ne ƿacode ·
Þa gesaƿon þa turoniscan hu þa oþre slepon · 1475
⁊ ge-namon þæt lic þe þær læg on flora ·
⁊ to scipe bæron mid sƿiðlicre blisse ·
⁊ efston mid reoƿte on þære ea uigenna ·
⁊ sƿa forð on liger sƿyðe hlude singende ·
oð þæt hi becomon to þære byrig turonia ·
Þa ƿurdon þa oþre aƿrehte mid þā sange 1481
⁊ naht heora gold-hordas (sic) þe hi healdan sceoldon
hæbbende næron · ac hi ham ge-ƿendon
mid mycelre sceame · þæt him sƿa gelūpen ƿæs ·
Se halga lichama þa ƿearð geled on byrgene 1485
on þære ylcan byrig þær he bisceop ƿæs ·
mid micelre ƿurð-mynte · ⁊ þær ƿurdon siððan
fela ƿundra gefremode for his ge-earnungū ·
Syx ⁊ tƿentig ƿintra he ƿæs þær bisceop · 1489
⁊ seo burh-ƿaru ƿæs butan bisceope lange
ær martinus ƿære gehalgod to bisceope ·
for þā hæþen-scipe þe þæt folc þa be-eode ·
Sy ƿuldor ⁊ lof þam ƿel-ƿillendan scyppende 1493
þe his halgan sacerd sƿa geglengde mid ƿundrū ·
se þe on ecnysse rixaþ ælmihtig ƿealdend · Amen.
| Olim haec trastuli · sicuti ualui · sed modo praecibus · constrictus plenius. 1496
O martine sanctae meritis praeclare · iuua me miserum · meritis modicum ·
Caream quo neuis · mihimet nocuus · castiusque uiuam · Nactus iam ueniam ·