On þā ylcan dæge ambrosius se bisceop 1412
on mediolana byrig · þa þa he æt mæssan stod
þa ƿearð he on slæpe sƿa sƿa god ƿolde ·
⁊ hine nan man ne dorste naht eaðe aƿreccan ·
Sƿa-þeah æft̅ tƿā tidū hi hine aƿrehton 1416
⁊ cƿædon þæt se tima forþ-agán ƿære ·
⁊ þæt folc ƿære ge-ƿergod þearle ·
Se halga bisceop þa cƿ̅ · ne beo ge ge-drefede 1419
micclū me fremað þæt ic sƿa mihte slapon ·
forðan-þe me min drihten micel ƿundor æteoƿde ·
Ƿite ge þæt min broþor martinus se halga 1422
of lichaman is afaren · ⁊ ic his lic behƿearf
mid geƿunelicre þenunge · ⁊ þa þa ge me ƿrehton ·
þa næs his heafod-clað eallunga ful dón ·
Hi ƿurdon of-ƿundrode his ƿorda · ⁊ dæda · 1426
⁊ geaxodon on fyrste þæt se arƿurða martinus
on þā dæge ge-ƿát · þe ambrosius sæde ·
þæt he æt þæs halgan ƿeres lic-þenungum ƿære ·
| Eala eadig is se ƿer þe on his forð-siðe 1430
halgena ge-tel · healice sang ·
⁊ engla ƿerod blissode · ⁊ ealle heofon-ƿare
hī to-geanes ferdon · ⁊ se fula deofol
on his dyrstig-nysse þurh drihten ƿearð gescynd ·
Seo halige gelaðung on mihte is gestrangod · 1435
⁊ godes sacerdas synd geƿuldrode
mid þære onƿrigennysse martines forð-siðes ·
þonne se halga michahel mid englū under-feng ·
⁊ maria seo eadiga mid mædenlicū ƿerodum ·
⁊ neorxne-ƿang gehylt bliðne mid halgum ·