Martinus se eadiga ƿiste his ge-endunga 1306
lange ær he forð-ferde of þysum life to criste ·
⁊ he cydde his forð-sið sumū his gebroþrum ·
Þa ƿæron on þam timan æt condatensē mynstre 1309
þa preostas unge-hƿære · ⁊ he þider siðode
ƿolde hi gesibbian ær his forþsiðe ·
⁊ on sibbe for-lætan · godes ge-laþunge ·
He ferde ða þiderƿerd mid sumum gebroðrum · 1313
þa geseah he scealfran sƿimman on anū flode ·
⁊ gelome doppetan adune to grunde
ehtende þære fixa mid fræcra grædignysse ·
Þa cƿ̅ se halga ƿer to his geferum þus · 1317
Þas fugelas habbað feonda gelicnysse 1318
þe syrƿiað æfre embe ða unƿaran ·
⁊ grædiglice foð · ⁊ gefangene fordoð ·
⁊ of þam ge-fangenū ge-fyllede ne beoð ·
Þa bebead martin᷒ þam mæð-leasū scealfrum · 1322
þæt hi ge-sƿicon þæs fixnoðes · ⁊ siþedon to ƿestene ·
⁊ þa fugelas geƿiton aƿeg sona to holte ·
ealle | endemes · sƿa sƿa sé árƿurða hét ·
Mid þære ylcan hæse he afligde þa scealfran · 1326
mid þære þe he deofla a-dræfde of mannum ·