Licontius ƿæs gehaten sum ge-leafful þegen · 1277
þa gelamp his mannū · þæt hi lagon ealle
on un-asecgendlicū broce · ⁊ he sende geƿrit
to martine sona sumes helpes biddende ·
Þa onget se halga ƿer þæt hi ƿæron ge-þreade 1281
mid godcundre mihte · ⁊ þæt he mihte earfoþ-lice
þære bene him ge-tiðian · ac he ne ablan na sƿa-þeah ·
mid seofon-nihte fæstene him fore to-þingiende ·
oð-þæt he beget þæs þe he biddende ƿæs ·
Licontius þa cō ⁊ cydde þā halgan 1286
mid micelre þancunge · þæt his hiƿræden ƿæs
frā þam mænig-fealdum brocan þurh martinum alysed ·
⁊ brohte þam halgan an hund punda | to lace ·
Se halga ƿer þa nolde habban þone scæt · 1290
ne hine eac ne for-seah · ac sealde þæt feoh eall
for gehergodum mannum · ⁊ þa ðe on hæft-nedum ƿæron ·
⁊ hi ut alysde of þære yrmðe sƿa ·
Þa bædon þa gebroþra þone bisceop georne · 1294
þæt he þæs feos sumne dæl dyde into mynstre ·
cƿædon þæt him gneaðe ƿære heora ƿist · ⁊ scrud ·
Þa cƿ̅ se halga ƿer him to ⁊sƿare · 1297
fede us ure cyrce · ⁊ scryde us ure cyrce ·
⁊ ƿe of þysum sceatte naht us sylfum ne heoldon ·
Hƿæt ƿille ƿe lencg ƿritan be martines ƿundrū 1300
þonne sulpicius sæde · þæt hi synd ungerime ·
⁊ nan spræc ne mæg his mihta areccan ·
for-þan-þe he maran mihte hæfde on his munuc-hade ·
þonne on bisceop-hade · be ðam þe he sylf sæde ·
ac ƿe ƿillað nu secgan be his forð-siðe ·