Ða forlet martin᷒ sƿa he gemynte gefyrn · 0131
þone ƿoruldlican camp-dom · ⁊ to þā halgan ƿere ferde ·
hilariū þā bisceope on þære burh-scyre
þe is pictauis gehaten · forðan þe he ƿæs acunnod
on godes geleafan · ⁊ on goddre lare ·
⁊ he þa ƿunode mid þam ƿere sume hƿile ·
Þa ƿolde se halga hadian hine to diacone 0137
ac he ƿið-cƿæð gelome · cƿæð þæt he ƿyrðe nære ·
þa under-get se bisceop þæt he mihte hine gibigan
gif he him bude læssan hád · ⁊ bead hī þæt he ƿære
gehadod to exorcista · þæt ƿe hatað halsigend
þe ðe bebyt deoflū · þæt hi of gedrehtum mannū faran ·
⁊ he þa ne forsóc þone eadmoddran hád ·
ac ƿearð sƿa ge-hadod æt þam halgan bisceope ·
Þa æfter sumū fyrste he ƿearð on sƿefne gemynegod · 0145
þæt he sceolde his eþel · ⁊ his eard geneosian ·
⁊ fæder · ⁊ modor · þe fúllice ƿæron hæþene ·
⁊ he ferde ða be leafa þæs foresædan bisceopes ·
⁊ he hine georne bæd þæt he ongean cuman sceolde ·
Martin᷒ þa ferde to þam fyrlenan lande · 0150
⁊ þa þa he com to muntum · þa ge-mette he sceaðan ·
⁊ heora an sona his exe up abræd ·
ƿolde hine slean · ac him forƿyrnde sum oþer ·
sƿa þæt he þæt hylfe ge-læhte · ⁊ ƿið-hæfde þæt slege ·
He ƿearð sƿa-þeah ge-bunden bæftan to his bæce · 0155
⁊ heora anum | betæht þæt he hine bereafode ·
Þa ongan se hine befrinan hƿæðer he forht ƿære · 0157
oððe hƿæt he manna ƿære · oþþe he cristen ƿære ·
Þa ⁊ƿyrde martinus him anræd-lice · ⁊ cƿ̅ 0159
þæt he nære sƿa orsorh on eallum his life ·
for þā þe he ƿiste to-ƿerde godes
mild-heort-nysse sƿiþost on þā costnungum ·
⁊ cƿ̅ þæt he besargode sƿiðor his gedƿyldes
þæt he unƿyrðe ƿæs godes mild-heort-nysse ·
Began ða to bodigenne þa godspellican lare 0165
sƿa lange þam sceaðan oþþæt he ge-lyfde on god ·
⁊ martine fyligde micclum hine biddende
þæt he him fore gebæde · ⁊ he forð þurh-ƿunode
on æƿfæstre drohtnunge · ⁊ eft us þis cydde ·
Þa þa he com to mediolana · þa ge-mette hé ænne deofol 0170
on menniscum híƿe · ⁊ he martinū befrán
hƿider he siðode ·
Þa sæde him se halga 0172
þæt he þider ferde þe hine drihten clypode ·
Ða cƿ̅ se scucca sona him to andsƿare · 0174
Sƿa hƿider sƿa þu færst · oððe sƿa hƿæt sƿa þu beginst · 0175
þe bið ƿiþer-ræde seo deofol · ⁊ se halga ƿer him cƿ̅ to ·
Drihten me is on fultume · ne ondræde ic hƿæt man me dó · 0177
⁊ se deofol þær-rihte fordƿán on his ge-sihðe ·
Martinus þa ferde forð sƿa he ge-mynte · 0179
⁊ his modor ge-bigde to godes biggencgum ·
⁊ to þam halgan fulluhte · þeah þe his fæder nolde
bugan of þam gedƿylde · ⁊ þeah þurh drihtnes fultū
martin᷒ geriht-læhte manega of þam folce.
Þa asprang geond ealle ƿoruld arrianes gedƿyld · 0184
⁊ martinus mid geleafan micclum ƿan ongean ·
oðþæt he ƿearð | ge-sƿenct mid sƿiðlicum ƿitum ·
⁊ openlice be-sƿungen · ⁊ of þære byrig adræfed ·
He ferde þa ongean to italian lande · 0188
⁊ on mediolana him mynster arærde ·
forðan-þe se foresæda hilarius ƿas afaren to ƿræc-siðe ·
for þam ylcan ge-dƿylde þe þa dƿollice asprang ·
ac þa gedƿol-men sona hine adrifon þanon ·
⁊ hé ferde sƿá þanon to sumum ig-lande
gallinaria ge-haten · mid anum halgum mæsse-preoste ·
se leofode on ƿæstene be ƿyrta morum lange ·
Martin᷒ þa on þære tide on his mete þigde 0196
þa ættrian ƿyrt · þe elleborū hatte ·
⁊ þæt attor sona hine sƿiðe þreade
fornean to deaðe · ac he feng to his ge-bedum ·
⁊ eall seo sarnys him sona frā ge-ƿát ·
Þa æfter [sic @ Skeat] sumum fyrste þa ða he of-axod hæfde 0201
þæt se halga hilarius ham cyrran moste ·
of þam ƿrec-siðe · þa ge-ƿende he to him ·
⁊ he mid arƿurðnysse hine eft under-feng ·
⁊ martinus ða siððan him mynster þær arærde ·
gehende þære byrig · þe is gehaten pictauis ·