Hƿæt ða færlice ƿearð þæs fyrlenan leodscipes 0094
onræs into gallias · ⁊ Iulian᷒ se casere
gegaderode his here · ⁊ began to gifenne ·
ælcū his cempū cynelice sylene ·
sƿa sƿa hit ge-ƿunelic ƿæs ·
Þa ƿende martin᷒ 0098
þæt he þa ƿel mihte ƿilnian æt þā casere
þæt he of þā campdome þa cuman moste ·
hī ne ðuhte na frēfullic þæt he fenge to þære gife ·
⁊ syððan ne campode mid þā casere forð ·
He cƿ̅ þa to þā arleasan · oð þis ic cāpode þe · 0103
ge-þafa nu þæt ic gode campige heonon-forð ·
⁊ under-fó þine gife · se ðe feohte mid ðe
ic eō godes cempa ne mot ic na feohtan ·
Ða gebealh hine se casere · ⁊ cƿ̅ þæt he for yrhðe 0107
þæs to-ƿeardan gefeohtes · na for eaƿfæst-nysse
hine sylfne æt-brude sƿa þam campdome ·
Ac martin᷒ unforht to þam manfullan cƿ̅ · 0110
Gif ðu to yrhðe þis telst · ⁊ na to ge-leafan · 0111
nu to mergen ic stande on mines drihtnes naman
ætforan þā truman · ⁊ ic fare orsorh
mid rode-tacne gescyld · na mid readū scylde ·
oððe mid helme þurh þæs heres ƿerod
Þa het se arlease [sic @ Skeat] healdan þone halgan 0116
þæt he ƿurde ƿæpn-læs aƿorpen þā hæðenum ·
On þam æftran dæg dydon þa hæðenan 0118
þæt hi budon sybbe · ⁊ hi sylfe þam casere ·
⁊ ealle heora ðing to his anƿealde ·
Hƿam tƿynað lá forði þæt þæs geleaffullan ƿeres 0121
ƿære · se sige · þa þa him ƿæs getiþod
þæt he ƿæpenleas nære aƿorpen þam here ·
þeah þe se arfæsta drihten eaþe
mihte gehealdan and-sundne his cempan ·
He æt-bræd þæt | gefeoht · þæt furðon næron ge-ƿemmede 0126
martines gesihþa on oðra manna deaðe ·
Hƿilcne oþerne sige sceolde ure drihten 0128
syllan for his cempan selran þonne þone ·
þæt nan man ne sƿulte · ac þæt hí to sibbe fengon ·