Wol mich der ſinne· die mir ie gerieten die lere·
dc ich ſi mīne· vō herzen ie langer ie mere·
dc ich ir ere·
rehte als ein wunder· ſo ſvnder· ſo ſere·
mīne vn̄ meine· ſi reine· ſi ſelig ſi here·
Selden ich w̾e· vil rich vn̄ an froͤiden d̾ frůte·
wolde min ſwere· bedenkē dú vil hoh gemv̊te·
dv́ wol behv̊te·
voꝛ valſchē dingen· mit ſingen· ich mv̊te·
dc ſi min hv̊te· mit gv̊te· ſi liebe ſi gv̊te·
Min hende ich valde· mit trúwē al gernde vf ir fuͤſſe·
dc ſi als ýſalde· triſtanden mich troͤſten mvͤſſe·
vn̄ alſo gruͤſſe·
dc ir gebere· min ſw̾e· noch bvͤſſe·
dē ſi mich ſcheide· vō leide· ſi liebe ſi ſvͤſſe·
Min ſendes denken· da bi min ſinne algemeine·
gar ane wenken· beſoꝛgē beſvnder das eine·
wie ich ir beſcheine·
dc ich nv lange· mit ſange· ſi meine·
in stetem mv̊te· ſi gv̊te· ſi liebe ſi reine·
Ich wúnſche ich dinge· des einē dc voꝛ grawem hare·
mir da gelinge· bas danne ir genade gebâre·
troſt miner iare·
dc iſt ir ſchǒwe· ſi frǒwe zeware·
mich ſol ir lachē· fro machen· dú ſchone dú clare·