Wol ir ſi iſt ein ſelig wip·
dú vō ſend̾ arbeit nie leit gewan·
des hat ich den minē lip·
vil wol behuͤtet· wan dc mich ein ſelig man·
mit rehter ſtete hat ermant· dc ich im gůtes gan·
nv twīget mich der kvmber ſin vn̄ tuot mir we·
vn̄ iſt dc min angeſt gar·
ſin nemēt wol tvſēt ǒgē war·
wenne er kome da ich in ſe·
ER iſt mir lieb vn̄ lieber vil·
dāne ich im vil liebē māne ſage·
ob er 119r dc niht gelǒben wil·
dc iſt mir leit ſo nahe als ich die liebe trage·
getoꝛſte ich genendē· ſo wolde ich im enden ſine klage·
wan dc ich vil ſendes wip·
erfúrhtē mv̊s der eren min·
vn̄ des lebēneſ ſin·
d̾ mir ziſt alſam der lip·
Owe tet ich des er gert·
davon moͤht ich gewinnē leit vn̄ vngemach·
laſſe aber ich in vngewert·
dc iſt ein lon der gv̊tem manne nie geſchach·
alrerſt muͤt mich dc ich in alder mich ie geſach·
vn̄ ſol ich ſin zefrúnde enbern·
dc iſt mir leit vn̄ mv̊s doch ſin·
ich wil hvͤtē min·
ich engetar ſin niht gewern·