Was mac dc ſin dc dú w̾lt heiſſet minne·
vn̄ es mir tůt ſo we zaller ſtūde·
vn̄ es mir nimt ſo vil miner ſinne·
ine wāde niht dc es ieman erfunde·
getoꝛſte ich es iehen·
dc ich es hete geſehē·
da vō mir iſt geſchehen·
alſo vil h̾ze ſere·
ſo wolte ich daran gelǒbē iem̾mere·
Minne got mvͤſſe mich an dir rechē·
wie vil dv minem h̾zen der froͤide wendeſt·
vn̄ moͤhte ich dir din krūbes ǒge vs geſtechen·
des het ich reht wan dv vil lútzel endeſt·
an mir ſolhe not·
ſo mir din lip gebot·
vn̄ wereſt dv tot·
ſo dvhte ich mich riche·
ſvs mv̊ſ ich vō dir leben betwungenliche·