Wol ir si ist ein selig wip·
dú von sender arbeit nie leit gewan·
des hat ich den minen lip·
vil wol behuͤtet· wan dc mich ein selig man·
mit rehter stete hat ermant· dc ich im gůtes gan·
nv twinget mich der kvmber sin vnd tuot mir we·
vnd ist dc min angest gar·
sin nement wol tvsent ǒgen war·
wenne er kome da ich in se·
ER ist mir lieb vnd lieber vil·
danne ich im vil lieben manne sage·
ob er 119r dc niht gelǒben wil·
dc ist mir leit so nahe als ich die liebe trage·
getorste ich genenden· so wolde ich im enden sine klage·
wan dc ich vil sendes wip·
erfúrhten mv̊s der eren min·
vnd des lebennes sin·
der mir zist alsam der lip·
Owe tet ich des er gert·
davon moͤht ich gewinnen leit vnd vngemach·
lasse aber ich in vngewert·
dc ist ein lon der gv̊tem manne nie geschach·
alrerst muͤt mich dc ich in alder mich ie gesach·
vnd sol ich sin zefrúnde enbern·
dc ist mir leit vnd mv̊s doch sin·
ich wil hvͤten min·
ich engetar sin niht gewern·