Wer gesach den winter ie
also langen· vnzergangen·
al min blangen· nie vervie·
den hat svmer sigehaft·
Vber wunden· an den stunden·
er hat fvnden· sine kraft·
walt vnd ǒwe· sint nach růme
wol bekleit·
in dem tǒwe manig blv̊me
stet gespreit·
anger heide die sint beide·
94v mit ir kleide· vil gemeit·
Suͤsser grůs· tete bůs·
in ir vil schrike· sit ich dike·
lieblich blike· miden mv̊s·
Froͤit úch froͤit úch iung vnd alt·
swem dú minne lasse sinne·
der gewinne· si er balt·
niemer wirde ich rehte frô·
sit ir strale mir die quale·
zallen male· fuͤget so·
ach ich tore· wie si toͤret
sinne min·
sit ir ore· niht enhoͤret
minen pin·
von den mere· mv̊s min swere·
súfte bere leider sin·
Suͤsser grůs· tete bůs·
in ir vil schrike· sit ich dike·
lieblich blike· miden mv̊s·
Ich han dike froͤlich doch·
bi den ivngen· her gesvngen·
vngelvngen· ist mir noh·
des bin ich an froͤiden tot·
von ir schulden· nach der hulden·
ich mv̊s dulden· sende not·
ach wie cleine mich veruahet·
swas ich sage·
sit dú reine mich versmahet
alle tage·
sin enwende· vnd swende·
mir vol ende mine klage·
Suͤsser grůs· tete bůs·
in ir vil schrike· sit ich dike·
lieblich blike· miden mv̊s·
Minnecliche schoͤne gar·
ist min frowe· liehter schǒwe·
sam in tǒwe rosen var·
ir gebaren tůt mir wol·
swie ir guͤte· min gemvͤte·
sorgen fluͤte machet vol·
ach ich tumber wie mir meret
sende not·
sit min kvmber mih verseret
vf den tot·
in der wise wirde ich grise·
sit ich prise· ir múndel rot·
Suͤsser grůs·