We war vmbe truren wir·
io gezimt es niemen wol·
solher swere ich gerne enbir·
der ich niht geniessen sol·
warta wie dú heide stat·
schone in gruͤner wete·
als si die lieben svmer zit enpfangen hat·
Reht ist dc ein selic man·
sanft erwerbe swas er wil·
wan er lob gedienen kan·
als ich gerne tete vil·
er hat wunneklichen grůs·
von den besten die nv 186r lebent·
es ist ein not swer lange biten mv̊s·
Das ein wib getrúwe si·
des bedarf ich harte wol·
wan ich bin ir selten bi·
des ich niht engelten sol·
wan ich si dvr got verbir·
liesse ichs vmbe ir ere niht· so keme ich niemer einen fůs von ir·
Sine wil mich niht gewern·
dc ich ir gelige bi·
vnd enwil min niht enb̾n·
zeinem frúnde als giht si·
io ist si mir niht gehas·
da stvͤnde genade bi· so tete mir ein senfter vient bas·
Si wil mir gelonet han·
nv wil ich als si da wil·
dc mv̊s ich fúr gv̊t enpfan·
anders duhte sis zevil·
dc si mich ir dienen lat·
seht des tet ein heiden niht· io ist zevil ob sis niht svͤnde hat·