We war vmbe trurē wir·
io gezimt es niemē wol·
ſolher ſwere ich gerne enbir·
der ich niht genieſſen ſol·
warta wie dú heide ſtat·
ſchone ī gruͤner wete·
als ſi die lieben ſvmer zit enpfāgen hat·
Reht iſt dc ein ſelic man·
ſanft erw̾be ſwas er wil·
wan er lob gedienen kan·
als ich gerne tete vil·
er hat wūneklichē grůs·
vō den beſtē die nv 186r lebent·
es iſt ein not ſwer lange bitē mv̊ſ·
Das ein wib getrúwe ſi·
des bedarf ich harte wol·
wan ich bin ir ſelten bi·
des ich niht engeltē ſol·
wan ich ſi dvr got v̾bir·
lieſſe ichs vmbe ir ere niht· ſo keme ich niem̾ einen fůs von ir·
Sine wil mich niht gewern·
dc ich ir gelige bi·
vn̄ enwil min niht enb̾n·
zeinem frúnde als giht ſi·
io iſt ſi mir niht gehas·
da ſtvͤnde genade bi· ſo tete mir ein ſenfter vient bas·
Si wil mir gelonet han·
nv wil ich als ſi da wil·
dc mv̊s ich fúr gv̊t enpfan·
anders duhte ſis zevil·
dc ſi mich ir dienē lat·
ſeht des tet ein heidē niht· io iſt zevil ob ſis niht ſvͤnde hat·