Wa nv froͤide wa nv ere·
wa nv volger gv̊ter lere·
welt dv trurest al zesere·
din lop get an einem stabe·
húbscheit wc hie vor din krone·
do man ranc nah wibes lone·
ane valsch mit zúhten schone·
die hast dv geworfen abe·
reiner wibe gvͤtlich gruͤssen·
kan wol swere sorge buͤssen·
von dem hv̊bet zv̊ den fuͤssen·
dv́ vert in swacher tvgende habe·
Wib din name vns froͤide meret·
got hat dich mit selden geret·
dc din leben niht mer zerreret·
dv bist aller wunne ein tach·
wib dv solt vnwipheit miden·
vnd la dich die schande miden·
son mac niht din lob versniden·
ganc der scham mit zúhten nach·
wilt aber dv valsch fv́r tvgende minnen·
des wirt dv́ schande mit dir innen·
si lat dich vnpris gewinnen·
flúch ir mat si saget dir schach·
Ritterschaft· wie stet din orden·
sage an wem ist din wirde worden·
wan sach dich in tugenden horden·
dannoch wc din lop vil ganz·
dc klagent nv die edeln frǒwen·
dc man dinen schilt sol schǒwen·
also ganz vnd vnuerhǒwen·
wa ist din tvrnei wa ist din tanz·
dv mis din leben bas in der masse·
da dich dv́ schande in eren lâsse·
ir gewalt vert vf der strâsse·
setze vf wider der eren kranz·