Vil selig minne hab ich nv getan·
den dienst den din gewalt mir gebot·
des sol din helfe geniessen mich lan·
hilf ob dv kvnnest iht fúr sende not·
dc dv́ vil suͤsse noh getroͤste minen mv̊t·
dú mich truren tůt·
nv froͤit mich beide ir sit doch beide gůt·
IR edeln frǒwen ir vil reinú wib·
ich han geworben min vnd úwer dinc·
dc nieman meine mir valsche úwern lib·
des wúnsche ich iv da bi so ist min gerinc·
dc der vil gv̊ten der vil werden werde schin·
al dú stete min·
dc wil ich iemer besorgende sin·
Ich wúnsche vrǒwe dc ir schone lebt·
bi sender liebe svnder sweren mv̊t·
vnde mir zelone den wunsch wider gebt·
dc min gedinge noch werde so gůt·
dc si vil liebe die ich in dem herzen trage·
nach leitlicher klage·
mir fuͤgen mvͤsse vil froͤliche tage·
Der werlde werde ich vn werde als ein man
der nie nach eren nich froͤiden gerank·
ob ich ir iemer gewenke dar an·
ich si ir stete vnd steht ane wanc·
min trost min wunne miner selden keiserin·
sol si iemer sin·
des gert min stete vnd al dc herze min·
Mich lat niht scheiden ir wert svͤsser lib·
von miner stete noch dc herze min·
Mich kan vnstete kein ander wib·
ir niht gemachen des mv̊s si mir sin
vor allen wiben wan ir guͤte ist so gv̊t·
dc ich hohen mv̊t·
han von ir gvͤte swie si mir tůt·