Triſtan mvͤſe ſvnder ſinen dank·
ſtete ſin der kúniginne·
wan in der poýſvn dar zv̊ twanc·
mere dan dú kraft der minne·
deſ ſol mir dú gůte danc·
wiſſen das ich ſolkē tranc·
nie genam vn̄ ich ſi doch minne·
bas danne er vn̄ mac das ſin·
wol getane·
valſches ane·
la mich weſen din·
vn̄ bis dv min·
Sit dú ſvnne ir liehten ſchin·
gegen der kelte hat geneiget·
vn̄ dú cleinen vogellin·
ir ſanges ſint geſweiget·
truric iſt das herze min·
ich wenne es wil winter ſin·
der vns ſine craft erzeiget·
an dien blv̊men die man ſiht·
in liehter varwe·
erblichen garwe·
da von mir beſchiht·
leit vn̄ anders niht·