Swen wunder dc ich si geswigen·
der vrage mich ich kans im wol bescheiden·
mir hant dú wib so vil verzigen·
dc mir durh not dc singen mv̊ste erleiden·
si ieman nv der sanges ger·
der wúnsche dc mir noch dú svͤze ir liebe wer·
des ich zir gvͤte han gegert·
so bin ich vro vnd mache ir hohe wirde wert·
Dú liebe liebet sich so mir·
dc mir die lieben nieman kan erleiden·
der selben liebe dinge ich zir·
gerůchet si mirs nach genaden scheiden·
so schiet ich von sender not·
svs mv̊s ich liden kvmber vnz an minen tot·
ich sihe si han so svͤzes leben·
dc ân ir trost mir nieman froͤide kan gegeben·
Ich sv̊hte lieb do vant ich leit·
wil dc dú liebe mit ir guͤte wenden·
so si dir truren widerseit·
wer kan mit senfte vnsenfte not verenden·
min herze wc vil nah verzaget·
da von das mir so dike sere wart versaget·
nv laze eht es sin wanken sin·
es wanke hin es wanke her sist wider in·