Swen wund̾ dc ich ſi geſwigē·
d̾ vꝛage mich ich kans im wol beſcheidē·
mir hāt dú wib ſo vil v̾zigē·
dc mir durh not dc ſingē mv̊ste erleidē·
ſi iemā nv d̾ ſanges ger·
d̾ wúnſche dc mir noch dú ſvͤze ir liebe wer·
des ich zir gvͤte han gegert·
ſo bin ich vꝛo vn̄ mache ir hohe wirde w̾t·
Dú liebe liebet ſich ſo mir·
dc mir die lieben niemā kan erleidē·
d̾ ſelbē liebe dinge ich zir·
gerůchet ſi mirs nach genadē ſcheidē·
ſo ſchiet ich vō ſend̾ not·
ſvſ mv̊s ich lidē kvmb̾ vnz an minē tot·
ich ſihe ſi hā ſo ſvͤzes lebē·
dc ân ir troſt mir niemā froͤide kā gegeben·
Ich ſv̊hte lieb do vant ich leit·
wil dc dú liebe mit ir guͤte wēdē·
ſo ſi dir trurē wid̾ſeit·
wer kan mit ſenfte vnſenfte not v̾endē·
mī h̾ze wc vil nah v̾zaget·
da vō das mir ſo dike ſere wart v̾ſaget·
nv laze eht es ſin wāken ſin·
es wanke hin es wāke her ſiſt wid̾ in·