Swas dú werlt nach froͤiden ie vf hohen mv̊t gewarb·
sine werbe ǒch noh dc ist alles ein niht·
wan dc nie gar in sende leit an mir verdarb·
von maniger froͤmder vngeschiht·
so fvnde ich dc·
des ich mich noh wol verwene an minem mv̊te·
dc ich mich nie gefroͤite bas·
geshe ǒch mir von der vil werde lebende iht zegv̊te·
Wol gedingen vnd ie doh niht vollen wol geleben·
so fúrhte ich vil lihte ein ende nemen·
der selbe trost ist mir ze miner not gegeben·
sol dc der lieben wol gezemen·
so wundert mich·
sol ich zwiuellicher froͤide an si gedingen·
so sol si bc bedenken sich·
ich enkvnde von den meren niemer gůtes niht gesingen·
Swer zúrnet so dc es gat vúr die ere hin·
der vbersiht der wisen rat·
sol úwer dienst verlorn an mir einen sin·
so were ǒch dc ein missetat·
vergêsset ir
dur dc eine der vůgen ob ich an iv eine vůge tete·
so wene ich were besser mir
ich hete iv lieb danne ich den haz von schulden vf mir hete·