Swar ich var vnd swas ich frowen han gesehen·
swas man ir tvgende seit vnd von ir schoͤne singet·
doch hoͤre ich der reinen minnenklichen iehen·
des besten wan dc mich ir gvͤte vnsenfteklichen twinget·
wol mich dc man der klaren giht·
dc si so vil der tvgende hat vnd da bi wiblich guͤte·
wol mich dc man die schonen siht·
so gar an allen wandel leben des froͤit sich min gemvͤte·
wol mich dc ich si mir zefrowen han erkorn·
si reine fruht so svͤsse ein lib wart nie geborn·
wol mich ir tvgende so wol mich húte vnd iemer wol·
wol mich dc ich si han gesehen wol mich dc ich ir dienen sol·