Sol ich nv verstvmmen·
dur den winter lang·
des war ich wil vns tvmmen·
singen disen sang·
mirst ein hohgemvͤte
in minen lip geflogen·
von ir dú wibes gvͤte
ie was vnbetrogen·
sist mir zallen ziten in dem sinne·
der ich nie vergas·
wan si wendet minne mit vnminne
durch steten has·
Si kan truren swachen
das ist mir wol kvnt·
ach sroͤlich lachen
kan ir roter mvnt·
Si mag mir wol bringen·
froͤiderichen mv̊t·
dar nach wolt ich ir singen
swie si mir ioch tv̊t·
es wiget vngeliche mir gegen ir·
ich bin ir sicherliche·
holder danne si mir·
minne wis geliche mit der wâge
92v sit dc ich bin din·
neina tůs ê mich der zit betrage
svͤsse troͤsterin·
Si kan truren swachen
das ist mir wol kvnt·
ach sroͤlich lachen
kan ir roter mvnt
Gib ein liebes ende·
mir vil selig wib·
an alle missewende·
lebt din kúscher lib·
lieb vor allen vrowen
schoͤne minneklich·
la dine tvgende schowen
vnd troͤste mich·
tůst dv dc so bin ich froͤidebere
mines herzen trut·
lieb nv wende mine sende swere
stille vnd vberlut·
Si kan truren swachen
das ist mir wol kvnt·
ach sroͤlich lachen
kan ir roter mvnt