Sint willekomen fro svmerzit·
sint willekome her meie·
der manigem hohgemvͤte git·
vnd sich mit liebe zweie·
ich sihe min lieb fúr blv̊men schin·
min lieb fúr vogel singen·
min lieb mv̊s dv́ vil liebe sin·
min lieb dc kan wol zwingen·
vnd owe lieb solt ich mit liebe ringen·
Vil manegerhande varwe hat·
in sinem krame der meie·
dú heide wunnekliche stat·
mit blv̊men maniger leie·
sint gel gruͤn rot sint bla brvn blank·
sint wunneklich entsprvngen·
dú vogelin hoͤhent ir gesanc·
mich mag dú liebe ivngen·
heý wirt si mir so habe ich wolgesvngen·
Min liep so vil derschoͤne treit·
von dem ich singe húre·
min lieb ist liep es ist niht leit·
min lieb ist vil gehúre·
min lieb ist vro dc lâsse ich sin·
min lieb in rehter gvͤte·
min lieb ist rehter selden schrin·
das ir got iemer hvͤte·
wie gar min herze danne in froͤiden bluͤte·