Sint willekomē fro ſvmerzit·
ſint willekome her meie·
der manigem hohgemvͤte git·
vn̄ ſich mit liebe zweie·
ich ſihe min lieb fúr blv̊mē ſchin·
min lieb fúr vogel ſingē·
min lieb mv̊s dv́ vil liebe ſin·
min lieb dc kan wol zwingen·
vn̄ owe lieb ſolt ich mit liebe ringē·
Vil manegerhande varwe hat·
in ſinem krame der meie·
dú heide wūnekliche ſtat·
mit blv̊mē maniger leie·
ſint gel gruͤn rot ſint bla bꝛvn blank·
ſint wūneklich entſpꝛvngē·
dú vogelī hoͤhent ir geſanc·
mich mag dú liebe ivngen·
heý wirt ſi mir ſo habe ich wolgeſv̄gen·
Min liep ſo vil derſchoͤne treit·
vō dem ich ſinge húre·
min lieb iſt liep es iſt niht leit·
min lieb iſt vil gehúre·
min lieb iſt vꝛo dc lâſſe ich ſin·
min lieb in rehter gvͤte·
min lieb iſt rehter ſeldē ſchꝛin·
das ir got iem̾ hvͤte·
wie gar min h̾ze danne in froͤidē bluͤte·