Sich froͤwet min gemuͤte zallen ſtunden·
durch ein reine ſelig wip·
dv́ mir recht̾ guͤte hat enbunden·
gar von ſoꝛgen mir den lip·
dv́ iſt behůt
valſches hoch gemůt·
vn̄ iſt werd
ſwenne ir mundel lachet·
ſo loſlich ſi das machet·
das min herze zv̊ ir gert·
Ach dvr got wie rechte zartlich wende·
kunnen ſich ir ǒgen clar
zwar ſi treit gar ſlechte wîſſe hênde·
wolgeſtalt vnmaſſen gar·
ſint da dein
inne ich wene nein·
tar ichs ie·
ſo iſt ir blanke kel·
des ich nicht enhel·
wiſſer danne tuſent ſne·
Man ſeit ſwa man ringe nach des werde
ime ze leiſte doch ſin teil·
ſo laſ mir gelinge· an dir vil werde·
ich rang ie das von dir heil
mir geſchehe·
lieber lib lac ſehe·
haſt dus můt·
ſpꝛich ia ſuͤſſe reine·
wiltus aber meine·
ia ia ia ſpꝛich ſoſt es gůt·