Sich froͤwet min gemuͤte zallen stunden·
durch ein reine selig wip·
dv́ mir rechter guͤte hat enbunden·
gar von sorgen mir den lip·
dv́ ist behůt
valsches hoch gemůt·
vnd ist werd
swenne ir mundel lachet·
so loslich si das machet·
das min herze zv̊ ir gert·
Ach dvr got wie rechte zartlich wende·
kunnen sich ir ǒgen clar
zwar si treit gar slechte wîsse hênde·
wolgestalt vnmassen gar·
sint da dein
inne ich wene nein·
tar ichs ie·
so ist ir blanke kel·
des ich nicht enhel·
wisser danne tusent sne·
Man seit swa man ringe nach des werde
ime ze leiste doch sin teil·
so las mir gelinge· an dir vil werde·
ich rang ie das von dir heil
mir geschehe·
lieber lib lac sehe·
hast dus můt·
sprich ia suͤsse reine·
wiltus aber meine·
ia ia ia sprich sost es gůt·